Dunsanak pandanga nan ambo hormati, budi kato urang awak, akhlak bahaso arab, moral atau etika kecek urang barat, toto kromo istilah urang jawa, adolah kadar nan manantukan tinggi randahnyo martabat seseorang itu nan di katokan sebuah pantun ibarat :
dek ribuik rabahlah padi di cupak datuak tumangguang
kok hiduik indak babudi duduak tagak kamari cangguang
nan kuriak kendi nan merah sago
nan baiak budi nan indah baso
pisang ameh di bao balaia pisang lidi di dalam peti
hutang ameh dapek di baia hutang budi di bao mati
Banyak pantun jo ibarat, patatah jo patitih nan bisa baumpamo malatakkan hargo jo tarif hargo diri pribadi manusia itulah pandangan adat sepanjang paradaban Minangkabau.
Mako Islam pun datang ka Minangkabau "Ahlan Musahlan yaa Islam" Inyo mambao sasuatu nan pado hakikatnyo lah ado di nagari Minangkabau tapi jauh labih indah dan langkok karano datangnyo dari Allah zat nan Maha Sempurna.
Sabunyi balain sabuik , sawajah bukan sanamo yaitu namoyo akhlak nan aratinyo budi sabagaimano sabda Rasulullah :
"Innama buistu Liutammimma Karimal Akhlak" artinyo sesungguhnya Aku diutus untuk menyempurnakan Akhlak manusia. (H.R: Bukhari dan Muslim).
Nan bak malacuik kudo jatuh, takayuah biduak ka hilia itulah ikhwal perjalanan Islam di peradaban tanah Minang, memang salah satu misi Rasulullah untuk menyempurnakan peradaban manusia sepanjang zaman, mako diturunkanlah Baliau pado masyarakat nan paliang bobrok wakatu itu, bangso Arab Jahiliyah, sabananyo pengertian jahiliyah itu adalah "Bodoh". Sabananyo Bodoh pangartian secara harfiah masyarakat Arab sebelum kedatangan Islam bukanlah masyarakat bodoh kabudayaannyo termasyur di timur dan di barat pardagangan nyo maju, ilmu filsafatnyo tinggi, pemerintahannyo taratur dan seni sastra nyo mangagumkan. Meraka kayo jo ilmu dan materi tapi miskin dengan akhlak.
Tidak ada komentar:
Posting Komentar