Syarak mangato adat mamakai 8

Allahu Akbar. Kaum Fukaha mangatokan "Kahirunnnas Maiyan Fa'unnas" aratinyo sabaik-baiknyo manusia adolah nan bamanfaat bagi manusia nan lain. Mukasudnyo iyolah kahadiran kito dalam masyarakat handaknyo jadi sitawa sidingin, mambarikan katantraman, mambaok barakaik nan bak umpamo payauang panji mambarikan palinduangan dalam bataduah dek paneh jo ka hujanan budi nan rancak.

Kok kusiuik sato manyalasiakan

Tibo karuah sato mampajaniah

Parang pucuak sangketo labiah nan senjang diluruskan

Walau basilang karih di lihia, baliak bajimba baji makan

Nan bana disabuikkan juo

"Ulil Haq walau kana mul rat" katokan nan bana walaupun pahiak. Sabaliaknyo urang nan paliang cilako adolah urang nan manjadi silang kareh, kacang miang dalam nagari. Resah maysarakaik dek lakunyo kambang maksiat dek ulahnyo, batabua fitnah dek muluiknyo, sahinggo kok mati sujuid syukur urang batapuak bakuliliang, batu mejan nyo di ludahi kudian masuk narako.

Bagitu Islam mangenalkan "Akhlakul Kharimah" budi nan baiak baso awaknyo. Iko suato mato rantai nan mampatamukan antaro adat jo Islam itu ciek, nan kaduo, faktor nan manjadi rueh panghubuang antara syarak jo adat adolah adonyo parsamaan pandangan tantang perananan akal jo pikiran dalam kahidupan untuak mamiliah antara baiak jo buruak.

Adat minangkabau mandidiak urang Minangkabau dalam mampagunokan akal jo pikiran, kunyah-kunyah sabalum dilulua gamah-gama sabalum di paciak, usah satu duduak satu maunjua satu tagak satu balari dulu patuih tagak dari kilek mukasuik inyo iyolah barang seuatu hendaklah dipikia masak-masak sabalum mahangguak atau manggeleang, kok mamak mangatokan elok baa elok, elok dek mamak alun tantu elok dek kamanakan, pareso dulu lai kok bana nyo manahan bandiang luruihnyo barantang banang patah di makan siku-siku, di teliti dinalarkan dengan akal sehat patuik alah mungkin baru sinan baiyokan tapi kalau bukan itu nan disabuiknyo tapi nan salah di banakan walau dari sia pun tarabik nyo musti di tulak matah-matah, indak ado istilah nrimo di kamus adat, sifat mblelo indak dikenal terhadap pambangkangan dari pangulu kalau inyo salah.