syarak mangato adat mamakai 7

Martabat perempuan di injak dan dilecehkan, gadis-gadis nan rancak di anggap komoditi barang mewah nan di parabuikkan kaum bangsawan Arab Quraisy. Parang antar suku nan barawal dari masalah cewek acok tajadi sanhinggo perempuan dianggap pangka bala ulu panyakit. Sabab karano itu satiok padusi nan lahia di bunuh atau di kubua hiduik-hiduik. Martabat urang awam indak labiah dari taraanak nan di pajua balikan dari suatu sistem perbudakkan, nan bagak nan bakuasa nan kayo mamaciak dunia nan bodoh makanan nan cadiak.

Urang mancari perlindungan bukan ka Tuhan tapi ka tukang-tukang ramal atau dukun, singkek kato pendek rundiangan bangso Arab Jahiliyah adalah simbol masyarakat biadab sapanjang sajarah, kamarilah nabi di utus. Malalui pribadi dan gaya hiduik Rasulullah, sungguah banyak suri tauladan nan dapek di contoh oleh umat, tutua kato laku parangai bahkan diamnyo sajo jadi pidoman urang banyak.

Malah sajak remaja bujang tangguang Muhammad dikenal dengan pemuda jujur, dan bijaksana sehingga beliau gi gelari dengan Al-Amin. Dalam jihad reformasi nyo baliau dan umatnyo salalu di musuhi bangso nyo sandiri diancam nak di bunuh, di teror, di intimidasi, di boikot, bahkan di kenai embergo ekonomi dengan larangan manjua bahan makanan, sahinggo ndak ado jalan lain dengan maninggakan kampaung halaman bapisah jo nagari nan di cinto Nabi tapaso Hijrah dari Makkah ka Madinah.

Tapi lah sukses di parantauan ilmu banyak bando pun lai pangalaman lah sarik pulo dan nan pasti iman dan taqwa makin mapan mako baliak lah baliau jo rombongan malanjuikkan bangkalai nan alun sudah. Kalau manuruikkan kato nafsu sinan lah mako hutang balansaikan piutang batarimokan babaia, kasampatan mambaleh dandam malapehkan sakiak hati ka bakeh musuah dahulu tapi dengan ketinggian akhlk Islam dek Muhammad urang babudi musuah-musuah lamo di maafkan, malah jagoan tokoh masyarakat Quraisy nan paliang jajok kapado Rasulullah Abu Syofyan namonyo di hormati hak-hak azazi nyo di anjuangkan martabatnyo.

Tatkalo pasukan tempur Islam mamasuki kota Makkah mako kalua pangumuman nabi untuak mancari kaamanan supayo balinduang dalam Ka'bah atau masuk ka rumah Abu Sofyan.